अक्षर आकार:

दयानन्दस्तवः

Dayananda Stava

दयानन्दस्तवः

(गीतिका) (प्रमाणिका वृत्तम्) नमामि मूलशकरं दयाऽऽकरं गुणाऽऽकरम् । प्रभाऽऽकरं सुधाऽऽकरं समस्त-लोक-भास्करम् ॥ नमामि०॥ १ स्व-ज्ञान-दीप्ति-भास्वरं गुण-प्रभा-विकस्वरम् । स्व-योग-रोचिषाऽऽवृतं तपो-विधृतं-कल्मषम् ॥ नमामि०॥ २ महर्षि-वृन्द-वन्दितं श्रुतेर्निनाद-नन्दितम् । अनाथ-नाथमाश्रयं सदा सदार्य-संश्रयम् ॥ नमामि०॥ ३ भजे गुणैक मानिनं श्रुति-प्रभैक्-ध्यायिनम् । भवाब्धि-दोष-पायिनं सुखौघ-शान्ति-दायिनम् ॥ नमामि०॥ ४ तमोऽपहं रजोऽपहं अजस्रमात्म-दोष-हम् । तप-प्रपूत-मानसं अनार्य-वृन्द-शासनम् ॥ नमामि०॥ ५ श्रये गुणोच्चयाऽऽश्रयं मनोज-भाव-संश्रयम् । भवाऽब्धि-दुःख-वारकं अशेष-दोष-हारकम् ॥ नमामि०॥ ६ श्रुति-स्मृति-प्रचारकं सदाऽऽर्य-वर्त्म धारकम् । दरिद्र-दीन-तारकं गुण-प्रभा-प्रसारकम् ॥ नमामि०॥ ७ त्वदङ्ध्रि-पद्म-सेवनं समस्त-शोक-शोषणम् । अशेष-दोष-दूषणं सुखौध सिन्धु पोषणम् ॥ नमामि०॥ ८ गुणाऽश्रयं प्रभाऽऽश्रयं समस्त-गौरवाऽऽश्रयम् । परार्थ-त्यक्त-विग्रहं त्विषा-प्रदीप्त-विग्रहम् ॥ नमामि०॥ ९ नमामि लोक-लोचनं स्फुरत्प्रभा-प्ररोचनम् । सुधी-प्रवीर-रञ्जकं समस्त-दोष-भञ्जकम् ॥ नमामि०॥ १०