अक्षर आकार:

भक्तेच्छापूर्तिकरं हरिस्तोत्रम् अथवा वेगासेतुस्तोत्रम्

bhaktechChApUrtikaraM haristotram or athavA vegAsetustotram

भक्तेच्छापूर्तिकरं हरिस्तोत्रम् अथवा वेगासेतुस्तोत्रम्

श्रीगणेशाय नमः । एकं वेगवती मध्ये हस्तिशैले च दृश्यते । उपायफलभावेन स्वयं व्यक्तं परं महः ॥ १॥ ईष्टे गमयितुं पारमेष सेतुरभङ्गुरः । यत्र सारस्वतं स्रोतो विश्राम्यति विश‍ृङ्खलम् ॥ २॥ जयति जगदेकसेतुर्वेगवतीमध्यलक्षितो देवः । प्रशमयति यः प्रजानां प्रथितः संसारजलधिकल्लोलान् ॥ ३॥ विभातु मे चेतसि विष्णुसेतुर्वेगापगावेगविघातहेतुः । अम्भोजयोनेर्यदुपज्ञमासीदभङ्गरक्षाहयमेधदीक्षा ॥ ४॥ चतुराननसप्ततन्तुगोप्ता समये तत्परिपन्थिनो निरुन्धन् । परिपुष्यति मङ्गलानि पुंसां भगवान् भक्तिमतां यथोक्तकारी ॥ ५॥ श्रीमान् पितामहवधूपरिचर्यमाणः शेते भुजङ्गशयने समहाभुजङ्गः । प्रत्यादिशन्ति भवसञ्चरणं प्रजानां भक्तानुगन्तुरिह तस्य गतागतानि ॥ ६॥ प्रशमितहयमेधव्यापदं पद्मयोनेः श्रितजनपरतन्त्रं शेषभोगे शयानम् । शरणमुपगताः स्म शान्तनिःशेषदोषं शतमखमणिसेतुं शाश्वतं वेगवत्याः ॥ ७॥ शरणमुपगतानां सोऽयमादेशकारी शमयति परितापं सम्मुखः सर्वजन्तोः । शतगुणपरिणामः सन्निधौ यस्य नित्यं वरवितरणभूमा वारणार्द्रीश्वरस्य ॥ ८॥ काञ्चीभाग्यं कमलनिलया चेतसोऽभीष्टसिद्विः कल्याणानां निधिरविकलः कोऽपि कारुसयराशिः । पुण्यानां नः परिणतिरसौ भूषयन् भोगिशय्यां वेगासेतुर्जयति विपुलो विश्वरक्षैकहेतुः ॥ ९॥ वेगासेतोरिदं स्तोत्रं वेकटेशेन निर्मितम् । ये पठन्ति जनास्तेषां यथोक्तं कुरुते हरिः ॥ १०॥ इति श्रीवेदान्तदेशिककृतं वेगासेतुस्तोत्रं अथवा भक्तेच्छापूर्तिकरं हरिस्तोत्रं सम्पूर्णम् ॥ (काञ्चीक्षेत्रे वेगवतीतीरे रचितम्)