अक्षर आकार:

दशावतारस्तोत्रम् ७

Dashavatara Stotram 7

दशावतारस्तोत्रम् ७

वेदोद्धारविचारमते सोमकदानवसंहरणे । मीनाकारशरीर नमो हरिभक्तं ते परिपालय माम् ॥ १॥ मन्थानाचलधारणहेतो देवासुरपरिपाल विभो । कूर्माकारशरीर नमो हरिभक्तं ते परिपालय माम् ॥ २॥ भूचोरकहर पुण्यमते क्रीडोद्धृतभूदेशहरे । क्रोढाकारशरीर नमो हरिभक्तं ते परिपालय माम् ॥ ३॥ हिरण्यकशिपुच्छेदनहेतो प्रह्लादाभयधारणहेतो । नरसिंहाच्युतरूप नमो हरिभक्तं ते परिपालय माम् ॥ ४॥ बलिमदभञ्जन विततमते पादद्वयकृतलोककृते । वटुपटुवेष मनोज्ञ नमो हरिभक्तं ते परिपालय माम् ॥ ५॥ क्षितिपतिवंशसम्भवमूर्ते क्षितिपतिरक्षाक्षतमूर्ते । भृगुपतिराम वरेण्य नमो हरिभक्तं ते परिपालय माम् ॥ ६॥ सीतावल्लभ दाशरथे दशरथनन्दन लोकगुरो । रावणमर्दन राम नमो हरिभक्तं ते परिपालय माम् ॥ ७॥ कृष्णानन्त कृपाजलधे कंसारे कमलेश हरे । कालियमर्दन कृष्ण नमो हरिभक्तं ते परिपालय माम् ॥ ८॥ त्रिपुरसती मानविहरणा त्रिपुरविजयमार्गनरूपा । शुद्धज्ञानविबुद्ध नमो भक्तां ते परिपालय माम् ॥ ९॥ शिष्टजनावन दुष्टहर खगतुरगोत्तमवाहन ते । कल्किरूपपरिपाल नमो भक्तां ते परिपालय माम् ॥ १०॥ नामस्मरणादन्योपायं न हि पश्यामो भवतरणे । राम हरे कृष्ण हरे तव नाम वदामि सदा नृहरे ॥ ११॥ इति दशावतारस्तोत्रं सम्पूर्णम् ।