श्रीशिवविभक्तिस्तोत्रम्
(स्रग्विणी)
अव्ययः स्वस्तिदः शङ्करः पातु मां
ईश्वरस्त्र्यम्बकः सिद्धिदः पातु माम् ।
ऊर्ध्वरेताः शिवो धूर्जटिः पातु मां
भास्वरो भैरवो मुक्तिदः पातु माम् ॥ १॥
अष्टमूर्ति शिवं विश्वनाथं हरं
भूतनाथं भवं वैद्यनाथं मृडम् ।
दक्ष-जामातरं यज्ञविध्वंसकं
भालनेत्रं सदा सादरं नौम्यहम् ॥ २॥
योगिना निर्मितं विश्वमेतत् पुरा
शम्भुना रक्षितं विश्वमेतत् सदा ।
शूलिना नाशिता आपदः प्राणिनां
सौख्यदं तं शिवं प्राञ्जलिः स्तौम्यहम् ॥ ३॥
शम्भवे स्थाणवे भिक्षवे योगिने
शूलिने धन्विने दैत्यहन्त्रे नमः ।
विश्वकर्त्रे नमो विश्वधर्त्रे नमो
विश्वसंहारिणे भक्तपात्रे नमः ॥ ४॥
वह्रिनेत्रात्तथा सर्वभूतात्मनो
नीलकण्ठात्तथा शैलजावल्लभात् ।
वामदेवात्तथा दक्षयज्ञान्तकाद्
व्योमकेशात्परं दैवतं नापरम् ॥ ५॥
यज्ञसंहारिणः शूलिनः शृङ्गिणो
जाह्नवीधारिणो धन्विनो धूर्जटेः ।
अष्टमूर्तेस्तथा भानुकोटिद्युतेः
पादपद्मं सदा ध्यायते योगिभिः ॥ ६॥
ईश्वरे शङ्करे पार्वतीवल्लभे
त्र्यम्बके धूर्जटौ सर्वभूताधिपे ।
चन्द्रचूडे तथा व्याघ्रचर्मावृते
विश्वनाथे मनः सर्वदा लीयताम् ॥ ७॥
शूलपाणे विभो विश्वनाथ प्रभो
भस्ममन्दाकिनीभूषिताङ्ग प्रभो ।
अष्टमूर्ते विभो मुण्डमाल प्रभो
चन्द्रमौले विभो धुर्जटे पाहि माम् ॥ ८॥
विभक्तिरूपस्य सदाशिवस्य
स्तोत्रं सुरम्यं मनुजः पठित्वा ।
अनन्यचित्तेन प्रतिप्रभातं
कल्याणमाप्नोतु शिवप्रसादात् ॥ ९॥
इति श्री आपटीकरविरचितं श्रीशिवविभक्तिस्तोत्रं सम्पूर्णम् ।
सोशल मीडिया पर शेयर करें:
सहेजें एवं डाउनलोड करें (Save & Export):