अक्षर आकार:

श्रीमल्लिकार्जुन प्रपत्तिः

Shri Mallikarjuna Prapatti

श्रीमल्लिकार्जुन प्रपत्तिः

जय जय जय शम्भो ! जम्भभित्पूर्वदेव प्रणतपदसरोजद्वन्द्व ! निर्द्वन्द्व ! बन्धो ! जय जय जय जन्मस्थेमसंहारकार ! प्रणयसगुणमूर्ते ! पालयास्मान् प्रपन्नान् ॥ १॥ वधूमुखं वल्गदपाङ्गरेखमखण्डितानन्दकरप्रसादम् । विलोकयन् विस्फुरदात्मभावस्स मे गतिश्श्रीगिरिसार्वभौमः ॥ २॥ कुरङ्गपाणिः करुणावलोकः सुरोत्तमश्चन्द्रकलावतंसः । वधूसहायस्सकलेष्टदाता भवत्यसौ श्रीगिरिभाग्यराशिः ॥ ३॥ सन्ध्यारम्भविजृम्भितं श्रुतिशिरस्थ्सानान्तराधिष्ठितं सप्रेमभ्रमराभिराममसकृत्सद्वासनाशोभितम् । भोगीन्द्राभरणं समस्तसुमनःपूज्यं गुणाविष्कृतं सेवे श्रीगिरिमल्लिकार्जुनमहालिङ्गं शिवालिङ्गितम् ॥ ४॥ या मूलं सचराचरस्य जगतः पुंसः पुराणी सखी व्यक्तात्मा परिपालनाय जगतामाप्तावतारस्थितिः । दुष्टध्वंस-सदिष्टदानविधये नानासनाध्यासिनी श्रीशैलाग्रनिवासिनी भवतु मे श्रेयस्करी भ्रामरी ॥ ५॥ यत्तेजः परमाणुरेतदखिलं नानास्फुरन्नामभिः भूतं भावि भवच्चराचरजगद्धत्ते बहिश्चान्तरे । सा साक्षात् भ्रमराम्बिका शिवसखी श्रीशैलवासोत्सुका दिश्यादाश्रितलोककल्पलतिका श्रेयांसि भूयांसि नः ॥ ६॥ शरणं तरुणेन्दुशेखरश्शरणं मे गिरिराजकन्यका । शरणं पुनरेव तावुभौ शरणं नान्यदुपैमि दैवतम् ॥ ७॥ इति श्रीमल्लिकार्जुन प्रपत्तिः समाप्ता ।