अक्षर आकार:

श्रीमृत्युञ्जयस्तोत्रम्

Shri Mrityunjaya Stotram

श्रीमृत्युञ्जयस्तोत्रम्

शम्भो महादेव शम्भो महादेव शम्भो महादेव गङ्गाधर । मृत्युञ्जय पाहि मृत्युञ्जय पाहि मृत्युञ्जय पाहि मृत्युञ्जय ॥ धृ॥ अद्रीशजाधीश विद्राविताघौघ भद्राकृते पाहि मृत्युञ्जय ॥ मृत्युञ्जय ॥ आकाशकेशामराधीशवन्द्य त्रिलोकेश्वर पाहि मृत्युञ्जय ॥ मृत्युञ्जय ॥ इन्दूपलेन्दुप्रभोत्फुल्लकुन्दारविन्दाकृते पाहि मृत्युञ्जय ॥ मृत्युञ्जय ॥ ईशार्चिताङ्घ्रे महेशाखिलावास काशीपते पाहि मृत्युञ्जय ॥ मृत्युञ्जय ॥ उक्षेशसञ्चार यक्षेशसन्मित्र दक्षार्चित पाहि मृत्युञ्जय ॥ मृत्युञ्जय ॥ ऊहापथातीतमाहात्म्यसंयुक्त मोहान्तक पाहि मृत्युञ्जय ॥ मृत्युञ्जय ॥ ऋद्धिप्रदाशेष बुद्धिप्रतारज्ञ सिद्धेश्वर पाहि मृत्युञ्जय ॥ मृत्युञ्जय ॥ ऋपर्वतोत्तुङ्गश‍ृङ्गाग्रसङ्गाङ्गहेतो सदा पाहि मृत्युञ्जय ॥ मृत्युञ्जय ॥ लब्धात्मभक्तौघसङ्घाति सङ्घातकारिप्रहन् पाहि पाहि मृत्युञ्जय ॥ मृत्युञ्जय ॥ लूतीकृतानेकपारादिकृत्यन्तनीयाधुना पाहि मृत्युञ्जय ॥ मृत्युञ्जय ॥ एकादशाकारराकेन्दुसङ्काश शोकान्तक पाहि मृत्युञ्जय ॥ मृत्युञ्जय ॥ ऐश्वर्यधामार्क वैश्वानराभास विश्वाधिक पाहि मृत्युञ्जय ॥ मृत्युञ्जय ॥ ओषध्यधीशांशुभूषादिपापौघमोक्षप्रद पाहि मृत्युञ्जय ॥ मृत्युञ्जय ॥ औद्धत्यहीनप्रबुद्धप्रभाव प्रबुद्धाखिल पाहि मृत्युञ्जय ॥ मृत्युञ्जय ॥ अम्बासमाश्लिष्ट लम्बोदरापत्य बिम्बाधर पाहि मृत्युञ्जय ॥ मृत्युञ्जय ॥ अस्तोककारुण्य दुस्तारसंसारनिस्तारण पाहि मृत्युञ्जय ॥ मृत्युञ्जय ॥ कर्पूरगौरोग्र सर्पाढ्य कन्दर्पदर्पापह पाहि मृत्युञ्जय ॥ मृत्युञ्जय ॥ खद्योतनेत्राग्निविद्युद्ग्रहाक्षादि विद्योदित पाहि मृत्युञ्जय ॥ मृत्युञ्जय ॥ गन्धेभचर्माङ्गसक्ताङ्ग संसारसिन्धुप्लव पाहि मृत्युञ्जय ॥ मृत्युञ्जय ॥ घर्मांशुसङ्काश धर्मैकसंप्राप्य शर्मप्रद पाहि मृत्युञ्जय ॥ मृत्युञ्जय ॥ ङोत्पत्तिबीजाखिलोत्पत्तिबीजामराधीश मां पाहि मृत्युञ्जय ॥ मृत्युञ्जय ॥ चन्द्रार्धचूड मरुन्नेत्र काञ्चीनगेन्द्रालय पाहि मृत्युञ्जय ॥ मृत्युञ्जय ॥ छन्दश्शिरोरत्न सन्दोहसंवेद्य मन्दस्मित पाहि मृत्युञ्जय ॥ मृत्युञ्जय ॥ जन्मक्षयातीत चिन्मात्रमूर्ते भवोन्मूलन पाहि मृत्युञ्जय ॥ मृत्युञ्जय ॥ झणच्चारुघण्टामणिव्रातकाञ्चीगुणश्रेणिक पाहि मृत्युञ्जय ॥ मृत्युञ्जय ॥ ञणित्यष्टचिन्तान्तरङ्ग प्रमोदाटनानन्दहृत्पाहि मृत्युञ्जय ॥ मृत्युञ्जय ॥ टङ्कातिटङ्क मरुन्नेत्र भृङ्गाङ्गनासङ्गत पाहि मृत्युञ्जय ॥ मृत्युञ्जय ॥ ठाली महापां केली तिरस्कारकारानल पाहि मृत्युञ्जय ॥ मृत्युञ्जय ॥ डोलायमानान्तरङ्गीकृतानेकलास्येश मां पाहि मृत्युञ्जय ॥ मृत्युञ्जय ॥ ढक्काध्वनिध्वानदाहध्वनिभ्रान्तशतृत्व मां पाहि मृत्युञ्जय ॥ मृत्युञ्जय ॥ णाकारनेत्रान्त सन्तोषितात्मश्रितानन्द मां पाहि मृत्युञ्जय ॥ मृत्युञ्जय ॥ तापत्रयात्युग्रदावानलसाक्षिरूपाव्यय पाहि मृत्युञ्जय ॥ मृत्युञ्जय ॥ स्थाणो मुरारातिबाणोल्लसत्पञ्चबाणान्तक पाहि मृत्युञ्जय ॥ मृत्युञ्जय ॥ दीनावनाद्यन्तहीनागमान्तैक मानोदित पाहि मृत्युञ्जय ॥ मृत्युञ्जय ॥ धात्रीधराधीशपुत्रीपरिष्वङ्गचित्राकृते पाहि मृत्युञ्जय ॥ मृत्युञ्जय ॥ नन्दीशवाहारविन्दासनाराध्य विन्दाकृते पाहि मृत्युञ्जय ॥ मृत्युञ्जय ॥ पापान्धकारप्रदीपाद्वयानन्दरूप प्रभो पाहि मृत्युञ्जय ॥ मृत्युञ्जय ॥ फालाम्बकानन्त नीलोज्ज्वलन्नेत्र शूलायुध पाहि मृत्युञ्जय ॥ मृत्युञ्जय ॥ बालार्कबिम्बांशुभास्वज्जटाजूटिकालङ्कृत पाहि मृत्युञ्जय ॥ मृत्युञ्जय ॥ भोगीश्वराकल्प योगिप्रियाभीष्टभोगप्रद पाहि मृत्युञ्जय ॥ मृत्युञ्जय ॥ मौलीद्युनद्यूर्मिमालाजटाजूटिकाप्रिय पाहि मृत्युञ्जय ॥ मृत्युञ्जय ॥ यज्ञेश्वराखण्डतद्ज्ञानिधे दक्षयज्ञान्तक पाहि मृत्युञ्जय ॥ मृत्युञ्जय ॥ राकेन्दुकोटिप्रतीकाशलोकादि सृड्वन्दित पाहि मृत्युञ्जय ॥ मृत्युञ्जय ॥ लङ्केशवन्द्याङ्घ्रिपङ्केरुहाशेष शङ्कासह पाहि मृत्युञ्जय ॥ मृत्युञ्जय ॥ वागीशतूणीरवन्दारुमन्दार शौरिप्रिय पाहि मृत्युञ्जय ॥ मृत्युञ्जय ॥ शर्वाखिलाधार सर्वेश गीर्वाणगर्वापह पाहि मृत्युञ्जय ॥ मृत्युञ्जय ॥ षड्वक्त्रतात त्रिषाड्गुण्यलोकादि सृड्वन्दित पाहि मृत्युञ्जय ॥ मृत्युञ्जय ॥ सोमावतंसान्तरङ्गे स्वयान्धाम सामप्रिय पाहि मृत्युञ्जय ॥ मृत्युञ्जय ॥ हेलानिगीर्णोग्र हालाहलासह्य कालान्तक पाहि मृत्युञ्जय ॥ मृत्युञ्जय ॥ क्षोणीधराधीश बाणासनावाप्तशोणाकृते पाहि मृत्युञ्जय ॥ मृत्युञ्जय ॥ क्षित्यम्बुतेजोमरुद्व्योमसोमात्मसत्याकृते पाहि मृत्युञ्जय ॥ मृत्युञ्जय ॥ शम्भोमहादेव शम्भोमहादेव शम्भोमहादेव गङ्गाधर ॥ मृत्युञ्जय ॥ मृत्युञ्जय पाहि, मृत्युञ्जय पाहि । मृत्युञ्जय पाहि, मृत्युञ्जय पाहि । मृत्युञ्जयो मुक्तिदाता अथ्यवोचदिति श्रुतौ ॥ मृत्युञ्जय ॥ भवरोग निमग्नानां भिषङ्मणिरितीरितः ॥ मृत्युञ्जय ॥ इति मृत्युञ्जयस्तोत्रं समाप्तम् ।