कैलासशैलशिखराधिपतिस्तवः
(वसन्ततिलका)
हे नीललोहित सदाशिव विश्वनाथ
मन्दाकिनी-सलिल-भूषण चन्द्रचूड ।
मृत्युञ्जय प्रणतभक्तजनार्तिनाशिन्
कैलास-शैल-शिखराधिपते नमस्ते ॥ १॥
कन्दर्प-दर्प-हर सर्प-विभूषिताङ्ग
भस्माङ्गराग नरमुण्ड-कपाल-माल ।
खट्वाङ्ग-शूल-डमरू-धर काशिनाथ
कैलास-शैल-शिखराधिपते नमस्ते ॥ २॥
शम्भो स्मरान्तक विभो वषभाधिरूढ
कारुण्य-वारि-जलधे प्रणमाम्यहं त्वाम् ।
संसार-सागर-जलादव मां महेश
कैलास-शैल-शिखराधिपते नमस्ते ॥ ३॥
त्रैलोक्यनाथ गिरिनाथ-सुताधिनाथ
भूताधिनाथ गणनाथ मखाधिनाथ ।
श्रीसोमनाथ जगतामधिनाथ नाथ
कैलास-शैल-शिखराधिपते नमस्ते ॥ ४॥
कर्पूरगौर हर शङ्कर घोररूप
हे नीलकण्ठ भुजगेश-विभूषिताङ्ग ।
विद्युत्प्रभारुणजटाधर वामदेव
कैलास-शैल-शिखराधिपते नमस्ते ॥ ५॥
विश्वावलीं सृजसि शैलसुतान्वितस्त्वं
विश्वम्भरोऽसि शिव-शक्तियुतो सुरेश ।
विश्वं विनाशयसि ताण्डव-नृत्य-काले
कैलास-शैल-शिखराधिपते नमस्ते ॥ ६॥
अज्ञान-कज्जल-विनाशकराय तुभ्यं
सूर्येन्दु-वह्नि-नयनाय सदा नमस्ते ।
दक्षात्मजा-प्रिय महेश्वर पार्वतीश
कैलास-शैल-शिखराधिपते नमस्ते ॥ ७॥
ओङ्काररूप शशिखण्ड-शिखण्ड-मौले
विश्वेश शर्व मदनान्तक शूलपाणे ।
रुद्राक्ष-हार विषमाक्ष पिनाकपाणे
कैलास-शैल-शिखराधिपते नमस्ते ॥ ८॥
कैलास-शैल-शिखराधिपतेः स्तवं यः
श्रद्धायुतो पठति नित्यमनन्यचित्तः ।
नश्यन्ति तस्य बहुजन्मकृतान्यघानि
शान्तिं च सोऽत्र लभते मनसः सुखं च ॥ ९॥
इति श्री आपटीकरविरचितः कैलासशैलशिखराधिपतिस्तवः सम्पूर्णः ।
सोशल मीडिया पर शेयर करें:
सहेजें एवं डाउनलोड करें (Save & Export):