अक्षर आकार:

जय मारुते

jaya mArute

जय मारुते

मन्दात्मकं मारुतिस्तोत्रम् । ॐ नमो वायुपुत्राय भीमरूपाय धीमते । नमस्ते रामदूताय कामरूपाय श्रीमते ॥ १॥ मोहशोकविनाशाय सीताशोकविनाशिने । भग्नाशोकवनायास्तु दग्धलङ्काय वाग्मिने ॥ २॥ गतिनिर्जितवाताय लक्ष्मणप्राणदाय च । वनौकसां वरिष्ठाय वशिने वनवासिने ॥ ३॥ तत्त्वज्ञानसुधासिन्धुनिमग्नाय महीयसे । आञ्जनेयाय शूराय सुग्रीवसचिवाय ते ॥ ४॥ जन्ममृत्युभयघ्नाय सर्वक्लेशहराय च । नेदिष्ठाय प्रेतभूतपिशाचभयहारिणे ॥ ५॥ यातनानाशनायास्तु नमो मर्कटरूपिणे । यक्षराक्षसशार्दूलसर्पवृश्चिकभीहृते ॥ ६॥ महाबलाय वीराय चिरञ्जीविन उद्धते । हारिणे वज्रदेहाय चोल्लङ्घितमहाब्धये ॥ ७॥ बलिनामग्रगण्याय नमो नमः पाहि मारुते । लाभदोऽसि त्वमेवाशु हनुमन् राक्षसान्तक । यशो जयं च मे देहि शत्रून्नाशय नाशय ॥ ८॥ श्रीवासुदेवानन्दसरस्वती । सङ्गीतेन वशीकरोति वरदं क्ष्माजाधवं राघवं यश्चामीकरचारुगात्रसुषमां विस्तारयत्यद्भुताम् । नानातालकलाकलापनिपुणः कौशन्यवद्गायति स प्रीणातु प्रशस्तगानरसिकव्यामोदिशाखामृगः ॥ सङ्गीतपारिजततः । दक्षिणे लक्ष्मणो यस्य वामे च जनकात्मजा । पुरतो मारुतिर्यस्य तं वन्दे रघुनन्दनम् ॥ १०॥ रामराक्षास्तोत्रतः । मारुतिं वीरवज्राङ्गं भक्तरक्षणदीक्षितम् । हनुमन्तं सदा वन्दे राममन्त्रप्रचारकम् ॥ ११॥ हनुमन्नञ्जनासूनो वायुपुत्र महाबल । अकस्मादागतोत्पातं नाशयाशु नमोऽस्तु ते ॥ १२॥ कुतोऽपि - (सोउर्चे उन्क्नोव्न्) उद्यन्मार्तण्डतेजःप्रसरपरिगतारक्तमेरुप्रभाभं वज्रप्रान्तानुकारि प्रखरनखमुखाघात सन्दारितारिम् । लोलल्लाङ्गूल लीलालुलित खलदलोद्दाम दर्पान्धनाकं कालं क्रूरग्रहाणां शतभयशमनं नौमि वायोः सुबालम् ॥ १२॥ धीरं धीरं धरित्रीं पदकमलमुखन्याससम्पीडयन्तं निक्वाणैर्नाशयन्तं निखिलकलिमलं तालजैः कङ्कणानाम् । गायन्तं राम रामेत्यतिरतिरभसैः राघवं संस्मरन्तं सङ्गीताचार्यवर्यं कविकुलतिलकं मारुतिं नौमि वीरम् ॥ १४॥ कूर्मो मूलवदालवालवदपां नाथो लतावद्दिशो मेघाः पल्लववत्प्रसूनफलवन्नक्षत्रसूर्येन्दवः । स्वामिन् ! व्योमतरुर्मम क्रमतले श्रुत्वेति गां मारुतेः सीतान्वेषणमादिशन् दिशतु वो रामः सहर्षः श्रियम् ॥ १५॥ हनुमन्नाटकतः खड्गं त्रिशूलं खट्वाङ्गं पाशमङ्कुशपर्वतम् । ध्रुवमुष्टिगदामुण्डं दशभिः कपिपुङ्गवम् ॥ एतान्यायुधजालानि धारयन्तं यजामहे ॥ १६॥ श्रीविद्यार्णवतः स्वप्रभोर्वाहकश्रेष्ठः श्वेतच्छत्रितपुच्छकः । सुखासनमहापृष्ठः सेतुबन्धक्रियाग्रणीः ॥ १७॥ कदाऽपि शुभ्रैर्वरचामरैः प्रभुं गायन् गुणान्वीजयति स्थितोऽग्रतः । कदाऽप्युपश्लोकयति स्वनिर्मितैः चित्रैः स्तवैः श्रीहनुमान्कृताञ्जलिः ॥ १८॥ बृहद्भागवतामृततः नखायुधाय भीमाय दन्तायुधधराय च । विहगाय च शर्वाय वज्रदेहाय ते नमः ॥ १९॥ ज्वलत्काञ्चनवर्णाय दीर्घलाङ्गूलधारिणे । सौमित्रिजयदात्रे च रामदूताय ते नमः ॥ २०॥ नारदपुराणतः द्विभुजं स्वर्णवर्णाभं रामसेवापरायणम् । मौञ्जीकौपीनसहितं मां ध्यायेद्रामसेवकम् ॥ २१॥ रामरहस्योपनिषदि श्रीविष्णोः श्रवणे परीक्षिदभवद्वैयासकिः कीर्तने प्रह्लादः स्मरणे, तदङ्घ्रिभजने लक्ष्मीः पृथुः पूजने । अक्रूरस्त्वभिनन्दने कपिपतिर्दास्येऽथ सख्येऽर्जुनः सर्वस्वात्मनिवेदने बलिरभूत् कृष्णाप्तिरेषां परम् ॥ २२॥ शौर्यं दाक्ष्यं बलं धैर्यं प्राज्ञता नयसाधनम् । तेजो धृतिर्यशो दाक्ष्यं सामर्थ्यं विनयो नयः । पौरुषं विक्रमो बुद्धिः यस्मिन्नेतानि नित्यदा । यस्य त्वेतानि चत्वारि वानरेन्द्र यथा तव । वाल्मीकि रामायणतः । मरुत्सुतं रामपदारविन्दवन्दारु बृन्दारकमाशु वन्दे । धीशक्तिभक्तिद्युतिसिद्धयो यं कान्तां स्वकान्तामिव कामयन्ते ॥ २६॥ रामचरिताब्धिरत्नतः । स्फटिकाभं स्वर्णकान्तिं द्विभुजं च कृताञ्जलिम् । कुण्डलद्वयसंशोभिमुखाम्बुजमहं भजे ॥ २७॥ हनूमान् रामपादाब्जसङ्गी वर्णिवरः शुचिः । सञ्जीवनोपहर्ता मे दीर्घमायुर्ददात्विह ॥ २८॥ श्रीतत्त्वनिधितः । सदा राम रामेति नामामृतं ते सदाराममानन्दनिष्यन्दकन्दम् । पिबन्तं नमन्तं सुदन्तं हसन्तं हनूमन्तमन्तर्भजे तं नितान्तम् ॥ १९॥
From Hanumatstutimanjari, Mahaperiaval Publication