अक्षर आकार:

श्रीगणेशाष्टकम्

Shri Ganesha Ashtakam

श्रीगणेशाष्टकम्

(भुजङ्गप्रयातम्) अविद्यानिहन्त्रे सुविद्याप्रदात्रे नमो विघ्नहन्त्रे सदानन्ददात्रे । उमाकान्तपुत्राय विघ्नान्तकाय नमस्ते नमस्तेऽन्तरायान्तकाय ॥ १॥ नमो भालचन्द्राय सिद्धिप्रदाय चिदानन्दरूपाय दुःखान्तकाय । अनन्ताय शान्ताय नागान्तकाय नमस्ते नमस्तेऽन्तरायान्तकाय ॥ २॥ नमस्ते भवानीसुपुत्राय नित्यं नमस्ते सदा भक्तचित्तार्तिनाशिन् । नमस्ते प्रभो ज्ञानदात्रे नमस्ते नमस्ते मनोवाञ् छितानन्ददाय ॥ ३॥ सुदूर्वाङ्कुरै रक्तपुष्पर्लसन्तं सदा मोदकैर्मोदमानं गजास्यम् । शमीपत्रतुष्टं सुगन्धप्रियं त्वां भवाम्भोधिमग्नो भवन्तं भजेऽहम् ॥ ४॥ अनाथार्तिनाशिन् पुरारातिपुत्र मयूरेश हेरम्ब हे ढुण्ढिराज । विनाशाय विघ्नस्य बद्धाञ्जलिस्त्वां अहं प्रार्थये भक्तियुक्तो गणेश ॥ ५॥ त्वदीयाय भक्ताय दत्त्वा वरांस्त्वं शुभैराशिभी रक्ष संसारसिन्धौ । अरे सिन्धुरारे दयाब्धे भवाब्धौ निमग्नं विपन्नं जनं पाहि नित्यम् ॥ ६॥ गणेश त्वदीयं पदाब्जं शरण्यं प्रसीद प्रसीद प्रभो पाशपाणे । वरेण्य प्रभो क्षेमदातर्नमस्ते सदा प्रार्थये त्वामहं भक्तियुक्तः ॥ ७॥ प्रसीद प्रसीद प्रतापार्क देव प्रसीद प्रसीदैकदन्त प्रभो त्वम् । प्रसीद प्रसीद प्रभो विघ्नहर्तः प्रसीद प्रसीद प्रभो वक्रतुण्ड ॥ ८॥ भुजङ्गप्रयाते निबद्धं मया यो गणेशाष्टकं भक्तियक्तश्च चित्ते । सदा ध्यायति स्तोत्रमेतत्स धन्यः सुखं शान्तिमाप्त्वाधिगच्छेत् स पुण्यम् ॥ ९॥ सखारामसूनुर्महादेवशर्मा लिखित्वा गणेशाष्टकं भक्तियुक्तः । परां शान्तिमाप्नोद् विनाशं विपत्ते- र्मनोवाञ्छितं श्रीगणेशकृपातः ॥ १०॥ इति श्री आपटीकरविरचितं श्रीगणेशाष्टकम् सम्पूर्णम् ।