अक्षर आकार:

श्रीपार्वत्यष्टकम्

Shri Parvatyashtakam

श्रीपार्वत्यष्टकम्

ॐ श्रीगणेशाय नमः । महारजतचेलया महितमल्लिकामालया तुलारहितफालया तुलितवारिभृज्जालया । शिवाभिमतशीलया शिशिरभानुचूडालया महीध्रवरबालया मम हृतं मनो लीलया ॥ १॥ नमज्जनभवान्तया नलिनशोभिनेत्रान्तया निरीतिकृदुदन्तया निजनिवासवेदान्तया । लसच्छुकशकुन्तया ललितकुन्दजिद्दन्तया मनो मम हृतं तया मनसिजान्तकृत्कान्तया ॥ २॥ सुर्वर्णसुमनासया सुरमहीधरावासया शशाङ्करुचिहासया शरबिषक्तबाणासया । कृपाकलितदासया कृतजगत्त्रयोल्लासया विभिन्नपुरशासया विवशितोऽहमत्रासया ॥ ३॥ कचालिजितभृङ्गया कमलजित्त्वरापाङ्गया कुतूहलिकुरङ्गया कुचयुगे महातुङ्गया । कनद्रुचितरङ्गया कलितविद्विषद्भङ्गया प्रसक्तहरसङ्गया परवशोऽस्मि वामाङ्गया ॥ ४॥ वतंसितकदम्बया वदनलोभिलोलम्बया करादृतकलम्बया क्रमविधूतकादम्बया । प्रणम्रधृतशम्बया प्रकटिताखिललम्बया हृतोऽस्मि जगदम्बया हृतशशाङ्कभृद्बिम्बया ॥ ५॥ जनीलसदहार्यया जनिमतां मनोधार्यया सुरारिवधकार्यया सुकृतिवैदितौदार्यया । परित्रयिविचार्यया प्रियकवृक्षभूचर्यया प्रकाशितहृदार्यया पशुपतेरहं भार्यया ॥ ६॥ प्रणम्रसुरवर्गया प्रकटितात्मभूसर्गया स्तुवानमुनिगर्गया स्तुतिकृदर्पितस्वर्गया । हिमाद्रिकुलनिर्गया हिततरत्नयीमार्गया मदाकुलितभर्गया मनसि मे स्थितं दुर्गया ॥ ७॥ पुरो नटितरम्भया पुरहरे स्थितारम्भया समग्रकुचकुम्भया सकलवन्द्यवाग्गुम्भया । शराहतनिशुम्भया शमितदुर्जनोज्जृम्भया भवाम्यहमदम्भया परवशो गणेड्डिम्भया ॥ ८॥ इति पार्वत्यष्टकं सम्पूर्णम् ॥