महाविद्या कवचम् २
सदाशिव ऋषि देवि उष्णिक्छन्दः उदीरितम् ।
विनियोगश्च देवेशि सततं मन्त्र सिद्धये ॥ १॥
मस्तकं पार्वतीपातु पातु पञ्चानन प्रिया ।
केशं मुखं पातु चण्डी भारती रुधिरप्रिया ॥ २॥
कण्ठं पातु स्तनं पातु कपालं पातु चैव हि ।
काली कराल वदना विचित्रा चित्रघण्टिनी ॥ ३॥
वक्षोमूलं नाभिमूलं दुर्गा त्रिपुरसुन्दरी ।
समस्तं पातु मे तारा सर्वाङ्गी सर्वमेव च ॥ ४॥
विश्वेश्वरी पृष्ठदेशं नेत्रं पातु महेश्वरी ।
हृत्पद्मं कालिका पातु कण्ठं पातु नभोगतम् ॥ ५॥
नारायणी गृह्य देशं मेढ्र मेढ्रेश्वरी तथा ।
पादयुग्मं जयापातु नित्यं मां चण्डिकाऽवतु ॥ ६॥
जीवं मां पार्वती सम्पातु मातङ्गी पातु सर्वदा ।
छिन्ना धूमा च भीमा च भये पातु जले वने ॥ ७॥
कौमारी चैव वाराही नारसिंही यशो मम ।
पातु नित्यं भद्रकाली श्मशानालयवासिनी ॥ ८॥
उदरे सर्वदा पातु सर्वाणी सर्वमङ्गला ।
जगन्माता जयं पातु नित्यं कैलाशवासिनी ॥ ९॥
शिवप्रिया सुतं सपातु सुतं पर्वतनन्दिनी ।
त्रैलोक्यं पातु बगला भुवनं भुवनेश्वरी- ॥ १०॥
सर्वाङ्गं सर्व निलया पातु नित्यश्च पार्वती ।
चामुण्डा पातु मे रोमकूपं सर्वार्थ साधिनी ॥ ११॥
ब्रह्माण्डं मे महाविद्या पातु नित्यं मनोहरा ।
लिङ्गं लिङ्गेश्वरी पातु महापीठे महेश्वरी ॥ १२॥
सदाशिवप्रिया पातु नित्यं पातु सुरेश्वरी ।
गौरी मे सन्धिदेशश्च पातु वै त्रिपुरेश्वरी ॥ १३॥
सुरेश्वरी सदापातु श्मशाने च शनेऽवतु ।
कुम्भके रेचके चैव पूरके काममन्दिरे ॥ १४॥
कामाख्या कामनिलयं पातु दुर्गा महेश्वरी ।
डाकिनी काकिनी पातु नित्यं शाकिनी तथा ॥ १५॥
हाकिनी लाकिनी पातु राकिनी पातु सर्वदा ।
ज्वालामुखी सदा पातु मुख्यमध्यं शिवाऽवतु ॥ १६॥
तारिणी विभवे पातु भवानी च भवेऽवतु ।
त्रैलोक्यमोहिनी पातु सर्वाङ्ग विजनेऽवतु ॥ १७॥
राजकुले महाघाते सङ्ग्रामे रिपुसङ्कटे ।
प्रचण्डा साधकं माञ्च पातु भैरव मोहिनी ॥ १८॥
श्री राजमोहिनी पातु राजद्वारे विपत्तिषु ।
सम्पद्प्रदा भैरवी च पातु वालावलं मम ॥ १९॥
नित्यं मां शम्भुवनिता पातु मां त्रिपुरान्तका ।
इत्येवं कथितं रहस्यं सर्व कालिकम् ॥ २०॥
भुक्तिदं मुक्तिदं सौख्यं सर्व सम्पद प्रदायकम् ।
यः पठेत् प्रातरुत्थाय साधकेन्द्रो भवेद् भुवि ॥ २१॥
कुञ्जवारे चतुर्दश्या ममायां मन्दवासरे ।
गुरौ गुरुं समभ्यर्च्चया यः पठेत्साधकोत्तमः ॥ २२॥
स याति भवनं देव्याः सत्यं सत्यं न संशयः ।
एवं यदि वरारोहे पठेद् भक्ति परायणः ॥ २३॥
मन्त्रसिद्धिः भवेत्तस्य चाचिरान्नात्र संशयः ।
सत्यं लक्ष पुरश्चर्या फलं प्राप्य शिवो व्रजेत् ॥ २४॥
पठित्वा कवचं स्तोत्रं भुक्तिमाप्नोति निश्चितम् ।
पठित्वा कवचं स्तोत्रं दशविद्या यजेत यदि ॥ २५॥
विद्या सिद्धिः मन्त्रसिद्धिः भवत्येव न संशयः ।
स्वरसिद्धिश्चितासिद्धिः दुर्लभा धरणी तले ॥ २६॥
अयत्न सुलभ सिद्धिस्ताम्बूलान्नात्र संशयः ।
निशामुखे निशायाञ्चा महाकाले निशान्तके ॥ २७॥
पठेद् भक्त्या महेशानि गाणपत्यं लभेत्तु सः ॥ २८॥
इति मुण्डमाला तन्त्रे एकादश पटले महाविद्या कवचं सम्पूर्णम् ॥
सोशल मीडिया पर शेयर करें:
सहेजें एवं डाउनलोड करें (Save & Export):