अक्षर आकार:

देवीधामाष्टकम्

Devidhamashtakam

देवीधामाष्टकम्

कस्मैचिदङ्घ्रिप्रणताखिलेष्टविश्राणनव्रीडितकौस्तुभाय । कामारिवामाङ्कजुषे किरीटकनच्छशाङ्काय नमोऽस्तु धाम्ने ॥ १॥ कस्मैचिदुद्यद्रविकोटिभासे कल्पद्रुमाणामपि गर्वहर्त्रे । पुण्ड्रेक्षुपाशाङ्कुशपुष्पबाणहस्ताय शस्ताय नमोऽस्तु धाम्ने ॥ २॥ कस्मैचिदाद्याय नमोऽस्तु धाम्ने बन्धूकपुष्पाभकलेबराय । कुलाद्रिवंशाम्बुधिकौस्तुभाय मत्तेभकुम्भस्तनबन्धुराय ॥ कस्मैचिदाद्याय नमोऽस्तु धाम्ने भण्डासुराम्भोनिधिबाडवाय । भक्तौघसंरक्षणदक्षिणाय भाधीशनीकाशमुखाम्बुजाय ॥ ४॥ कस्मैचिदस्तु प्रणतिः कराम्बुजातम्रदिम्ना हसते प्रवालम् । कारुण्यजन्मावनये कापर्दिमोदाब्धिराकारजनीकराय ॥ ५॥ कल्याणशैलाधिपमध्यश‍ृङ्गनिकेतनाय प्रणतार्तिहन्त्रे । क्रव्यादवैरिप्रमुखेडिताय कुर्मः प्रणामं कुतुकाय शम्भौ ॥ ६॥ कचप्रभानिर्जितनीरदाय कस्तुरिकाकुङ्कुमलेपनाय । बिम्बाधराय श्रुतिबोधिताय बन्धापनोदाय नमोऽस्तु धाम्ने ॥ ७॥ कटाक्षकाङ्क्षिप्रवरामराय कालारिचित्ताम्बुजभास्कराय । पटीयसे पापसमूहभेदे नमोऽस्तु कस्मैचिदमोघधाम्ने ॥ ८॥ इति श‍ृङ्गेरि श्रीजगद्गुरु श्रीसच्चिदानन्दशिवाभिनवनृसिंह- भारतीस्वामिभिः विरचितं श्रीदेवीधामाष्टकं सम्पूर्णम् ।