अक्षर आकार:

श्रीबालामन्त्रकवचस्तोत्रम्

Shri Bala Mantrakavacha Stotram

श्रीबालामन्त्रकवचस्तोत्रम्

आधारे तरुणार्कबिम्बरुचिरं हेमप्रभाभास्वरं बीजं मान्मथमिन्द्रगोपसदृशं हृत्पङ्कजे संस्थिताम् । रन्ध्रे ब्रह्मपदं च शाक्तमपरं हेमप्रभाभास्वरं ये ध्यायन्ति पदद्वयं तव शिवे ते यान्ति शैवं पदम् ॥ (एवं ध्यात्वा जपेद्वर्म सर्वकर्मसमृद्धये ।) ऐङ्कारी मे शिरः पातु क्लीं कारी हृदयं मम । सौः पातु पादयुग्मं मे सर्वाङ्गं सकलाऽवतु ॥ १॥ वाग्देवी मे शिरः पातु फालं पातु कुमारिका । भ्रूयुग्मं शाङ्करी पातु श्रुतियुग्मं गिरीश्वरी ॥ २॥ नेत्रे त्रिनेत्रवरदा नासिकां मे महेश्वरी । ओष्ठौ मे सुभगा पातु चुबुकं नववार्षिका ॥ ३॥ कपोले कमनीयाऽव्यात्कण्ठे कामार्चिताऽवतु । बाहू पातु वराभीतिधारिणी संप्रदायिनी ॥ ४॥ वक्षस्त्रिकं च पद्माक्षी कुचौ काञ्चीनिवासिनी । उदरं सुन्दरी पातु नाभिं नागेन्द्रवन्दिता ॥ ५॥ पार्श्वे पाशवहा पातु पृष्ठं पापविनाशिनी । कटीं कर्पूरहृद्देशी (विद्येशी) जघनं ललिताम्बिका ॥ ६॥ मेढ्रं महेशरमणी पातु मां फाललोचना । जानुनी जयदा पातु गुह्यं विद्याप्रदायिनी ॥ ७॥ पादौ निशार्चिता पातु प्रपदं त्रिपुरेश्वरी । सर्वाङ्गं सर्वदा पातु बाला त्रिपुरसुन्दरी ॥ ८॥ वित्तं वित्तेश्वरी पातु पशून्पशुपतिप्रिया । पुत्रान् पुत्रप्रदा पातु दानधर्मप्रदायिनी ॥ ९॥ क्षेत्रं क्षेत्रेशवनिता गेहं गम्भीरनादिनी । पातु धर्ममयी सर्वं शर्वसर्वेश्वरी रमा ॥ १०॥ इत्येतत्कवचं पुण्यं सर्वपाप्रणाशनम् । सर्वसौभाग्यजनकं सर्वरोगनिबर्हणम् ॥ ११॥ (विषज्वरहरं भूतवेतालादिनबर्हणम् । अपस्मारगदाशूलनेत्ररोगादिनाशनम् ॥ १२॥ पठ्यमानं तु सततं बहुदुःखापहं नृणाम् । जपेत्कुमारीकवचं त्रिकालेषु त्रिमासकम् ॥ १३॥ मुच्यते सकलाद्रोगात् कञ्चुकादिव पन्नगः । पठेद्यः प्रयतो वर्षं कुमारी तस्य सिद्धिदा ॥ १४॥ गङ्गातरङ्गविलसच्छीकराक्तमुखाम्बुजा । निष्कलङ्का प्रसन्नास्या सुधासिन्धुसमुज्ज्वला ॥ १५॥ अनेकमन्त्रराजोऽयमशेषं यो जपेन्नरः । तस्य संरक्षणं मन्त्रं वर्षमात्रस्य संशयः ॥ १६॥ प्रातःकाले तु सलिलं ब्राह्मणः प्रयतः शुचिः । मन्त्रं जपन् त्रिरावृत्त्या वर्मसिद्धो भवेन्नरः ॥ १७॥ अस्य मन्त्रप्रभावेन व्याख्याता स भवेद्ध्रुवम् । यद्दुस्साध्यतमं कार्यं तत्तु साध्यं भवेज्जपात् ॥ १८॥ तत्तस्तोत्रेण लभते नात्र कार्या विचारणा । करस्थं काञ्चनं कृत्वा कवचं स महान्भावेत् ॥ १९॥ बहुनाऽत्र किमुक्तेन सर्वकार्येषु सर्वदा । यद्यदर्थे प्रयत्नः स्यात्तत्तदर्थमिदं जपेत्) ॥ २०॥ इति श्रीबालामन्त्रकवचस्तोत्रं सम्पूर्णम् ।