अक्षर आकार:

अम्बा नवमणिमाला अथवा आर्या नवकम्

Amba navamanimala or Arya navakam

अम्बा नवमणिमाला अथवा आर्या नवकम्

वाणीं जितशुकवाणीमलिकुलवेणीं भवाम्बुधिद्रोणीम् । वीणाशुकशिशुपाणीं नतगीर्वाणीं नमामि शर्वाणीम् ॥ १॥ कुवलयदलनीलाङ्गीं कुवलयरक्षैकदीक्षितापाङ्गीम् । लोचनविजितकुरङ्गीं मातङ्गीं नौमि शङ्करार्धाङ्गीम् ॥ २॥ कमलाकमलजकान्ताकरसारसदत्तकान्तकरकमलाम् । करयुगलविधृतकमलां विमलां कमलाङ्कचूडसकलकलाम् ॥ ३॥ सुन्दरहिमकरवदनां कुन्दसुरदनां मुकुन्दनिधिसदनाम् । करुणोज्जीवितमदनां सुरकुशलायाऽसुरेषुकृतकदनाम् ॥ ४॥ अरुणाधरजितबिम्बां जगदम्बां गमनविजितकादम्बाम् । पालितसुजनकदम्बां पृथुलनितम्बां भजे सहेरम्बाम् ॥ ५॥ शरणागतजनभरणां करुणावरुणालयां नवावरणाम् । मणिमयदिव्याभरणां चरणाम्भोजातसेवकोद्धरणाम् ॥ ६॥ तुङ्गस्तनजितकुम्भां कृतपरिरम्भांशिवेन गुहडिम्भाम् । दारितशुम्भनिशुम्भां नर्तितरम्भां पुरो विगतदम्भाम् ॥ ७॥ नतजनरक्षादीक्षां प्रत्यक्षदैवताध्यक्षाम् । वाहीकृतहर्यक्षां क्षपितविपक्षां सुरेषुकृतरक्षाम् ॥ ८॥ धन्यां सुरवरमान्यां हिमिगिरिकन्यां त्रिलोकमूर्द्धन्याम् । विहृतसुरद्रुमवन्यां वेद्मि विना त्वां न देवतास्वन्याम् ॥ ९॥ एतां नवमणिमालां पठन्ति भक्त्येह ये पराशक्त्याः । तेषां वदने सदने नृत्यति वाणी रमा च परममुदा ॥ १०॥ पातय वा पाताले स्थापय वा सकलभुवनसाम्राज्ये । मातस्तव पदयुगलं नाहं मुञ्चामि नैव मुञ्चामि ॥ ११॥