शास्तृध्यानश्लोकानि
जीमूतश्यामधामा मणिमयविलसत्कुण्डलोल्लासिवक्त्रं
हस्ताभ्यां दक्षमात्रोत्पलमितरभुजं वामजानूपरिस्थम् ।
बिभ्रत्पद्मासनस्थः परिकलिततनुर्योगपट्टेन जुष्टः
श्रीपूर्णापुष्कलाभ्यां पुरहरमुरजित्पुत्रकः पातु शास्ता ॥ १॥
तेजोमण्डलमध्यगं त्रिनयनं दिव्याम्बरालङ्कृतं
देवं पुष्पशरेक्षुचापविलसन्माणिक्यपात्राभयम् ।
बिभ्राणं करपङ्कजैर्मदगजस्कन्धाधिरूढं विभुं
शास्तारं शरणं नमामि सततं त्रैलोक्यसम्मोहनम् ॥ २॥
तमालश्यामलं भद्रं पिङ्गलाकल्पसुन्दरम् ।
अधिज्यकार्मुकं वन्दे सत्यमव्यक्तयौवनम् ॥ ३॥
सुश्यामलकोमलविशालतनुं विचित्रं
वासोवसानमरुणोत्पलदामहस्तम् ।
उत्तुङ्गरत्नमकुटं कुटिलाग्रकेशं
शास्तारमिष्टवरदं शरणं प्रपद्ये ॥ ४॥
सोशल मीडिया पर शेयर करें:
सहेजें एवं डाउनलोड करें (Save & Export):